सहकारी बैंक पुरस्कृत


बागलुङ । राष्ट्रिय सहकारी बैंकले पोखराका २ सहकारीहरूलाई पुरस्कृत गरेको छ । आव २०७५/७६ मा उत्कृष्ट कारोबार गर्ने र नियमित कारोबार गर्ने सहकारी संस्थाहरूलाई हालै एक कार्यक्रमका बीच पुरस्कृत गरिएको हो ।


पोखरा शाखामा उत्कृष्ट कारोबार गर्ने रामबजारस्थित संगम बचत तथा ऋण सहकारी संस्था र नियमित कारोबार गर्ने नयाँबजारस्थित उन्नति बचत तथा ऋण सहकारी संस्थालाई पुरस्कृत गरिएको हो । संगम साकोसका अध्यक्ष निरज थापा र उन्नति साकोसका अध्यक्ष राजेश रानाभाटलाई बैंकका सञ्चालक तथा गण्डकी प्रदेशका संयोजक रामबहादुर जिसीले सम्मानपत्रसहित पुरस्कृत गर्नु भएको थियो । सहकारी बैंकले केन्द्रीयस्तर, प्रदेशस्तर र शाखास्तरमा उत्कृष्ट कारोबार गर्ने संस्थाहरूलाई पुरस्कृत गर्दै आएको बैंकका सञ्चालक जिसीले बताउनुभयो ।


बैंकको वार्षिक साधारणसभाका अवसरमा केन्द्रीय र प्रदेशस्तरीय पुरस्कार वितरण गर्नुका साथै शाखास्तरको पुरस्कार घोषणा गरी राष्ट्रिय सहकारी दिवसका अवसरमा वितरण गरिँदै आएकोमा यसपटक कोरोना संक्रमणका कारण ढिला भएको जिसीले जानकारी दिनुभएको थियो ।
कार्यक्रममा पुरस्कृत संस्था संगम साकोसका अध्यक्ष निरज थापाले राष्ट्रिय सहकारी बैंकले सहकारी संस्थाहरूको प्रवद्र्धनमा महत्वपूर्ण भूमिका निर्वाह गर्दै आएको बताउनुभयो । उहाँले नीति, विधि र प्रविधिको प्रयोगमार्फत आमसमुदायको आर्थिक सामाजिक रूपान्तरणका लागि सहकारी अभियानलाई थप प्रभावकारी बनाउन समन्वय र सहकार्यमा जोड दिनुभएको थियो ।
कार्यक्रम राष्ट्रिय सहकारी बैंक पोखरा शाखा समन्वय उपसमितिका संयोजक मेजर तुलसीप्रसाद गुरुङको अध्यक्षता, बैंकका सल्लाहकार तथा जिल्ला सहकारी संघ कास्कीका अध्यक्ष रविरमण तिवारीको स्वागत मन्तव्य र शाखा प्रमुख सन्तोष घिमिरेको सञ्चालनमा सम्पन्न भएको थियो ।
सहकारी बैंकका ४४ शाखामध्ये राजधानीबाहिरको उत्कृष्ट शाखाका रूपमा रहेको पोखरा शाखामा ३ सय ३१ सदस्य संस्था, १६ करोड सेयर पूँजी, ३ अर्ब ३५ करोड निक्षेप र ७५ करोड कर्जा लगानी रहेको शाखा प्रमुख घिमिरेले जानकारी दिनुभएको थियो ।


राष्ट्रिय सहकारी बैंकलाई नेपाल राष्ट्रबैंकले थप २४ वटा शाखा सञ्चालनका लागि अनुमति दिएको छ । गण्डकी प्रदेशमा कास्कीको तालचोक र स्याङ्जाको पुतलीबजारमा शाखा सञ्चालन हुने भएका छन् । नयाँ शाखा सञ्चालनको तयारी अन्तिम चरणमा पुगेको बैंकका सञ्चालक जिसीले जानकारी दिनुभएको थियो ।

अमेरीकामा आज राष्ट्रपति निर्बाचन


काठमाडौ । निक्कै महत्वकासाथ बिश्वले हरीरहेको अमेरिकाको ४६ औँ राष्ट्रपतिको निर्बाचन आज सुरु भएको छ । नोभेम्बर ३ अर्थात आज, अमेरिकाको ४६ औँ राष्ट्रपतिका लागि निर्वाचन हुँदै छ । निर्वाचनमा वर्तमान राष्ट्रपति डोनाल्ड जे ट्रम्प दोस्रो कार्यकालका लागि र पूर्वउपराष्ट्रपति जोजेफ आर बाइडेनबीच चुनावी भिडन्त हुँदैछ । अमेरिकी राजनीतिका विश्लेषकहरुले यो निर्वाचन राष्ट्रपति ट्रम्पका लागि निर्वाचन भन्दा बढी जनमत संग्रहको रूपमा रहेको बताउँदै आएका छन । रिपब्लिकन पार्टीको पर्यायवाचीजस्तै देखिएका ट्रम्पको आप्रवासी मुद्दामा अनुदार छवि बनेको भए पनि ‘अमेरिका पहिलो’ भन्दै आर्थिक विश्वव्यापीकरणभन्दा फरक धारको वकालत गरेकाले उनको लोकप्रियता अनुदारवादी कन्जर्भेटिभ्स अमेरिकी नागरिक माझ उस्तै छ । राजनीतिक विश्लेषकहरुले यो निर्वाचनलाई पछिल्लो शताब्दीकै सबैभन्दा महत्वपूर्ण निर्वाचनको रूपमा विश्लेषण गरिरहेका छन । उनिहरुका अनुसार निर्वाचनमा कम शिक्षित, पाका तथा ग्रामीण अमेरिकी मतदाताको ठूलो हिस्सा फेरि पनि राष्ट्रपति ट्रम्पकै पक्षमा देखिन्छ भने युवा, शिक्षित, तथा सहरी अमेरिकी जनता बाइडेनको पक्षमा छन । अमेरिकी जनताले ट्रम्पलाई पुनः राष्ट्रपतिमा निर्वाचित गर्ने हुन वा बाइडेनलाई साँचो सुम्पिने हुन त्यो हेर्नभने केहि दिन कुर्नुपर्ने देखिन्छ । यद्यपि निर्वाचनका लागि तोकिएको मतदान दिवस नोभेम्बर ३ अघि नै अर्थात नोभेम्बर २ हिजो सम्म ९ करोड ३५ लाख मतदाताले अग्रिम मतदान गरिसकेका छन । जसमा

‘युएस टुडे’ का अनुसार अग्रिम मतदानको ४८ दशमलव ३ प्रतिशत डेमोक्र्याटिक, ४१ दशमलव ५ प्रतिशत रिपब्लिकन र १० दशमलव २ प्रतिशत मत स्वतन्त्रको पक्षमा खसेको छ । यसर्थ पनि कसले बाजि मार्ने हो भन्ने अहिले यकिन नभएको बिश्लेषकहरुको भनाई छ ।

काँग्रेसको बैठक स्थगित


काठमाडौ । पटक पटक बिघटनको संघारमा पुगेको नेपाली कांग्रेसले फेरी आकस्मिक केन्द्रीय समिति बैठक बोलाएको छ । प्रतिनिधिसभा सांसदसमेत रहेका पार्टीका आमन्त्रित केन्द्रीय सदस्य सूर्यबहादुर केसीको निधन भएपछि काँग्रेसले केन्द्रीय समिति बैठक बोलाएको हो । बैठक आज दिउँसो १ बजे पार्टी केन्द्रीय कार्यालयमा बस्न लागेको हो । आज बस्ने केन्द्रीय समिति बैठकले शोक प्रस्ताव पारित गर्ने मुख्यसचिव कृष्णप्रसाद पौडेलले जानकारी दिनुभयको छ । कांग्रेसले आज दिउँसो १ बजेकालागि पार्टी पदाधिकारी र पूर्वपदाधिकारी बैठकसमेत राखेको थियो । केसीको निधनका कारण बैठक नबस्ने भएको कांग्रेसले जनाएको छ । ६३ बर्षिया केसीको गए राति पोखरास्थित घरमा निधन भएको थियो । उहाँ लामो समयदेखि मधुमेह र प्रेसर रोगबाट पीडित हुनुहुन्थ्यो ।

जीएसएम मोबाइल सञ्चालनमा ल्यायो


काठमाडौ । नेपाल टेलिकमले सोलुखुम्बुको विकट स्थान ताक्सिन्दु र जुभुमा जीएसएम मोबाइल सेवा सञ्चालनमा ल्याएको छ । गत असोज २९ देखि सञ्चालनमा आएको मोबाइल सेवामार्फत अब सो क्षेत्रका ग्राहकले कुराकानी गर्न र डाटा समेत चलाउन सक्नेछन् । यो भन्दा पहिले सो क्षेत्रमा कम्पनीको स्काई मोबाइलबाट मात्र सेवा उपलब्ध थियो । नुम्बुर हिमालको काखमा रहेको दुधकुण्ड नगरपालिकाको ताक्सिन्दुस्थित ३ हजार १३० मिटर उचाईमा जीएसएम प्रविधिको बीटीएस टावर स्थापना गरिएको छ । लुक्ला हुँदै नाम्चेसम्म पुग्ने पदयात्री यही रुट भएर जाने हुनाले यसबाट पर्यटकहरु समेत लाभान्वित हुने अपेक्षा गरिएको छ । सो क्षेत्रका नुनथला, फुलेबी, सेरा, खरिखोला, जुबिङ र पैयाँ लगायत क्षेत्रका करिब ६ सय घरधुरी अब कम्पनीको मोबाइल सेवाबाट प्रत्यक्ष रुपमा लाभान्वित हुनेछन् । सेवाग्राहीहरुको सुविधालाई ध्यानमा राखी दुर्गम तथा अति विकट स्थानका रुपमा चिनिने ती क्षेत्रका वस्तीमा नेपाल टेलिकमले निशुल्क सिम वितरण शुरु गरेको छ ।

त्यसैगरी सोलुकै दुधकोशी गाउँपालिका वडा नम्बर ४ जुबु बलंगामा अर्को टावर पनि हालै सञ्चालनमा ल्याइएको छ । करिब १ हजार २३० मिटर उचाईमा रहेको यो टावरले पनि सो क्षेत्र अन्तर्गत पर्ने देउसा, मुक्ली, कागेल, पञ्चन र जुभु गरी सो भेगमा रहेका ४ हजार घरधुरीलाई सेवा प्रदान गर्नेछ । यसका साथै ओखलढुंगाको रुम्जाटारमा नेपाल टेलिकमको ग्राहक सेवा केन्द्र पुनस्र्थापना गरिएको छ । कम्पनीले पहिले देखि नै रुम्जाटार र त्यहाँ रहेको विमानस्थलस्थित ग्राहक सेवा केन्द्रमार्फत सेवा प्रदान गरिरहेको भए तापनि करिब २ वर्ष देखि केन्द्र सञ्चालनमा थिएन । ग्राहक सेवा केन्द्र पुनस्र्थापना भएपछि सेवाग्राहीलाई टेलिफोन जडान गर्न, इन्टरनेट सुविधा लिन, नयाँ सिमकार्ड खरिद गर्न वा सिम परिवर्तन गर्न सहज हुनेछ । सार्थै सेवावापत भुक्तानी गर्नुपर्ने बिल पनि सो केन्द्रमा सहज रुपले भुक्तानी गर्न सकिनेछ ।

कोरोनाको नयाँ रेकर्ड


काठमाडौ । नेपालमा कोरोना संक्रमणले नयाँ रेकर्ड कामय गरेको छ । हिजो एकैदिन कोरोना संक्रमितको संख्या ५ हजार ७४३ जनामा फैलिएको छ । जुन नेपालकालागि नयाँ रेकर्ड हो । देशभरका प्रयोगशालामा २० हजार ७४२ नमुना परीक्षण गर्दा २७ दशमलव ६८ प्रतिशतमा संक्रमण पुष्टि भएको हो । नयाँ संक्रमितमध्ये ३ हजार १ सय ७ जना काठमाडौं उपत्यकाका छन । नेपालमा कोरोनाबाट संक्रमित हुनेको संख्या एक लाख ४४ हजार आठ सय ७२ पुगेको छ । संक्रमितमध्ये ९९ हजार ६ सय पाँच जना निको भइसकेका छन भने सात सय ९१ जनाको मृत्यु भइसकेका छन । त्यसैगरी विश्वमा आज बिहानसम्ममा ४ करोड १४ लाख ६२ हजार ३६ जना संक्रमित भएका छन भने ११ लाख ३५ हजार ६ सय ९७ जनाले ज्यान गुमाइसकेका छन । कोरोना भाइरसबाट सबैभन्दा बढी प्रभावित राष्ट्र संयुक्त राज्य अमेरिकामा संक्रमितको संख्या ८५ लाख ८४ हजार नाघेको छ भने भातरमा ७७ लाख पाँच हजार नाघेको छ ।